KLAPERTART FOR NGANA

Keke-keke sedia akang itu kukis
Sementara nyong kasih keluar itu saguer
Sesekali torang babadonci
Iko riang karena hati senang
Tengah malam nyanda terasa

Cingkeh so torang panen
Pai tua dan Mai tua ada tatawa
Kibas lenso sambil baku sedu
Karena tau esok so ada doi
Semua bisa bapontar pigi di Menado tua

Mar nyanda bisa tutup kita pe rasa
Ngana pe wajah trus membayang
Walau nampak jauh di pohon kelapa
Kirim kabar mar nyanda
Of ngana so malu jadi putra Kawanua?

Ngana so lupa pa tanah Toar Lumimuut?
Ngana so lupa ada janji pa kita?
Atau ngana so batona deng nona lain?
Air mata kita so nyanda guna
Sakit kita pe hati

Pigi jo dari kehidupan kita
Tapi jangan lupa kacang goyang deng manisan pala
Kalo esok ngana inga pa kita
Maaf kalo kita so kawing
Mar klapertart tetap ta simpan for ngana.

13 Juni 2007